لاہور (وقائع نگار خصوصی) لاہور ہائیکورٹ نے صوبائی حلقہ پی پی 161 لاہور 17 میں ووٹوں کی دوبارہ گنتی کا الیکشن کمیشن کا حکم نامہ کالعدم قرار دے دیا۔

جسٹس شاہد کریم پر مشتمل ہائی کورٹ کے سنگل بنچ نے پی پی 161 میں الیکشن کمیشن آف پاکستان کے ووٹوں کی دوبارہ گنتی کے حکم کے خلاف جیتنے والے امیدوار فرخ جاوید کی درخواست کی سماعت کی۔

بنچ نے درخواست منظور کرتے ہوئے حلقے میں ووٹوں کی دوبارہ گنتی کے الیکشن کمیشن کے حکم کو منسوخ کر دیا۔

ایم پی اے فرخ جاوید نے عدالت میں اپنی درخواست میں کہا کہ مسلم لیگ ن کے امیدوار عمر سہیل نے ووٹوں کی دوبارہ گنتی کے لیے الیکشن کمیشن میں درخواست جمع کرائی۔

درخواست گزار نے کہا کہ الیکشن کمیشن نے رنر اپ امیدوار کی درخواست منظور کرتے ہوئے ووٹوں کی دوبارہ گنتی کا نوٹس جاری کیا۔

انہوں نے دلیل دی کہ الیکشن کمیشن انتخابی عمل مکمل ہونے کے بعد ووٹوں کی دوبارہ گنتی کا حکم جاری نہیں کر سکتا۔

بنچ نے درخواست منظور کرتے ہوئے صوبائی حلقہ پی پی 161 میں ووٹوں کی دوبارہ گنتی کے الیکشن کمیشن کے حکم کو کالعدم قرار دے دیا۔